Dosja me emrat e 15 personave të akuzuar  në lidhje me skandalin e vjedhjes në Bankën e Shqipërisë  u dorëzua dje në Gjykatën e Tiranës.Prokuroria e Tiranës ka konsideruar të mbyllur hetimin dhe ka dërguar në gjykatë dosjen  me provat e mbledhura. Së shpejti pritet të fillojë procesi  për 15 ish punonjësit e bankës  të cilët akuzohen për “shpërdorim detyre”.

Organi i hetimit ka mbajtur 2 dosje të ndara për  ishguvernatorin  Ardian Fullani  dhe  të dyshuarin kryesor të vjedhjes  Ardian Bitraj.Prokuroria në dosjet e dërguara në gjykatë thekson se punonjësit e arkave ku mbaheshin paratë,specialistët e  kontrollit dhe mbikqyrjes, inventarizuesit e parave,drejtori i  Departamentit të  Emisionit Dorian Çollaku  dhe inspektorja  e Përgjithshme  Elivar Golemi kanë  shpërdoruar detyrën duke bërë të mundur  krijimin e kushteve  për vjedhjen  e bankës.

Prova kryesore në këtë hetim mbetet ende  dëshmia e të dyshuarit kryesor, Ardian  Bitraj.Në cilësinë e provave  prokuroria ka marrë  parasysh dhe  pamjet filmike të marra nga kamerat e sigurisë.Gjithashtu janë marrë si prova dhe  dokumentet e sekuastruara nga prokuroria   në ambientet e bankës gjatë hetimit.

/Arjola Hajdini/