Festivali i Këngës në RTSH starton sonte në mbrëmje në edicionin e tij të 52-të në Pallatin e Kongreseve i cili do të mbahet në datat 26, 27 dhe 28 dhjetor. Në këtë edicion të 52-të të festivalit, këngëtarët, kompozitorët dhe poetët do të prezantojnë për publikun 16 këngë në konkurrim.
Komisioni përzgjedhës, në takimin e fundit të zhvilluar përpara festivalit, midis 40 këngëve të paraqitura pranë redaksisë muzikore, ka përzgjedhur vetëm 16 prej tyre si konkurrentet e këtij edicioni. Por, ajo që tërhoqi më shumë vëmendje në këtë edicion të 52-të të këngës ishin emrat e antarëve të jurisë. Emra që këtë herë i takojnë fushës së muzikës si dhe nuk mungojnë dhe emra poetësh.
Emrat
Ajo që ka ndryshuar këtë vit është emri i njërit prej antarëve të jurisë, i cili vjen Këshilli Drejtues i RTSH, këtë vit duket se ka ndryshuar kjo formulë, asnjë prej tyre nuk do të jetë në juri. Edhe votimi që do të jetë në natën finale, është i njëjtë si në skemën e Eurovizionit. Juria nga 16 këngë do të votojë për 10 këngë, me pikët nga 1 deri në 12 duke përjashtuar shifrat 9 dhe 11.
Këngëtarët pjesëmarrës këtë vit në festival janë: Hersi Matmuja, Besiana Mehmedi & Shkodran Tolaj, Luiz Ejlli, Frederik Ndoci, Orges Toçe, Klodian Kaçani, Lindi Islami & Venera Lumani, Blerina Braka, Xhejsi Jorgaqi, Xhejn & Enxhi Kumrija, Grupi LYNX, Marjeta Billo, Sajmir Braho, Rezarta Smaja, Etmond Mancaku & Entela Zhula, Renis Gjoka. Sa u takon kompozitorëve, nga ata më të njohurit mund të përmendim Endri Sinën, Sokol Marsin, Klodian Qafokun dhe Gramoz Kozelin.
Për të 11-ën herë, kënga fituese do të përfaqësoje Shqipërinë në Festivalin Evropian të Këngës që do të mbahet në Kopenhagen, vitin që vjen.
/Sonila Qazimi/
]]>
Lini Komentin tuaj
Adresa juaj e emailit nuk do të publikohet. Fushat e kërkuara janë shënuar me *