Shtetet e Bashkuara thanë të enjten se do të ofrojnë më shumë se 1 miliard dollarë ndihmë humanitare për njerëzit e prekur nga pushtimi rus i Ukrainës.

Fondet do të ndihmojnë në sigurimin e ushqimit, strehimit, ujit të pastër, furnizimeve mjekësore dhe ndihmës tjetër, tha Shtëpia e Bardhë. Paratë e ofruara vijnë nga takimi i zhvillur mes presidentit të SHBA-ve Joe Biden dhe liderat evropianë. Biden po punon për të përcaktuar fazën tjetër të përgjigjes ndaj luftës së Rusisë.

Përveç kësaj, Shtëpia e Bardhë tha se do të ngrinte një fond prej 320 milionë dollarësh për të forcuar demokracinë në vendet në kufi me Bashkimin Evropian, duke përfshirë financimin për të drejtat e njeriut, median e pavarur dhe iniciativat kundër korrupsionit.

Denisa Kovaçi