Therja me thika e disa të rinjve që ka ndodhur javën e kaluar në njërën nga shkollat në Prishtinë,është vetëm një nga shumë rastet e dhunës ndërmjet nxënësve që po hasim kohëve të fundit.

Fatmirësisht, fëmija ka shpëtuar edhe pse ka marrë plagë thikash në gjoks, por fati nuk do të thotë se të përcjell gjithmonë dhe në çdo rast.

Prindërit duhet të kujdesen dhe ti kontrrollojnë femijët e tyre.Gjithashtu duhet ta dinë edhe institucionet shkollore që ballafaqohen shpesh me dhunë mes fëmijëve në shkolla.

Alush Istogu nga Ministria e Arsimit tha se Ministria ka një memorandum bashkëpunimi me Policinë e Kosovës për ofrimin e sigurisë në shkolla fillore dhe të mesme përmes patrullimit të policëve civil dhe atyre me uniformë përreth hapësirave shkollore.

Gjithashtu zyrtarë të Policisë së Kosovës thonë se Policia në baza ditore bën patrullime në afërsi të shkollave, sidomos gjatë vajtje-ardhjes dhe gjatë pushimeve të gjata me qëllim të ofrimit të sigurisë dhe parandalimit të çfarëdolloj incidenti.

Por, statistikat

e policisë tregojnë që në Kosovë ende vazhdon të ndodhë një numër shumë i madh i incidenteve nëpër shkolla.

Vetëm në gjysmën e parë të vitit 2013, sipas të dhënave të Policisë, nëpër shkolla kanë ndodhur 213 incidente të natyrave të ndryshme ku janë të përfshirë nxënësit. Vitin e kaluar gjatë tërë vitit në shkolla kanë ndodhur 351 incidente.

Zyrtarët e MASHT-it e përjashtojnë mundësinë e ndëshkimit, me përjashtimin e nxënësve të dhunshëm nga shkollat. Sipas tyre MASHT-i nuk lejon masa të tilla ndaj nxënësve, sepse ato mund të jenë kundër-produktive.

Ekspertët e fushës së psikologjisë vlerësojnë se janë një numër faktorësh që po e shkaktojnë nxitjen e dhunës te të rinjtë në përgjithësi, përfshirë edhe atë në shkolla.

Psikologu Dashamir Bërxulli, i cili për një kohë të gjatë është marrë me studimin e fenomenit të dhunës te nxënësit, shpjegon në një intervistë se ndër faktorët e parë që e nxisin dhunën nëpër shkolla, është toleranca shoqërore ndaj fenomenit të dhunës.

Ky fenomen, sipas tij, nuk manifestohet vetëm në shkolla, por dhe në familje dhe në rrethe të tjera shoqërore, ku zgjidhjet kërkohen duke u bazuar në forcën.

/Sonila Duka/