Mustafa Nano duket se ua njeh mirë “telat” shqiptarëve. Kur vjen puna për të provokuar ai di shumë mirë se si  të sillet.

Deklarata e tij për origjinën sllave të nënës së Skënderbeut ngjalli shumë debate në muajt  e shkuar. Kishte debate që u shoqëruan me tone të nxehta, deri në fyerje nga të dyja palët. Pavarësisht këtyre Nano nuk e mohon dhe vazhdon t’i qëndrojë deklaratës së tij.

“Dhe unë vijoj t’i qëndroj atij mendimi. Nëna e Skënderbeut ka qenë me origjinë serbe, ose, që t’i afrohemi ‘bombës’ ngadalë-ngadalë, le të themi që ajo ka qenë sllave. Dhe kjo është një gjë që dokumentohet”, shprehet Nano.

Në librin e tij më të fundit “Provocateur”, botuar nga UET PRESS, në kolanën “esse / ide & debate”, ndërtuar në formën e një interviste me vetveten, ai i rikthehet ndër të tjera edhe kësaj teme, origjinës së nënës së Skënderbeut dhe të vetë Heroit Kombëtar.