Pas një muaji Kosova do të hapë formalisht negociatat me Bashkimin Evropian për Marrëveshjen e Stabilizim-Asociimit.

Për këtë gjë në Prishtinë do të vijë Komisionari për Zgjerim, Stefan Fuele, ndërsa ekzekutivi po bën përgatitjet e fundit që Kosova të jetë maksimalisht e përgatitur.

Kryeministri Hashim Thaçi u tërhoqi vërejtje sërish institucioneve për humbjen e kohës, gjë të cilën nuk do ta tolerojë.

“Na ka mbetur edhe pak kohë deri në hapjen e negociatave, dhe duhet të sigurohemi që të ndërmarrin me kohë hapat e nevojshme për të siguruar një proces të shpejtë dhe kualitativ të negociatave me BE-në”, tha Thaçi.

Shefi i Qeverisë në Prishtinë e dha këtë paralajmërim gjatë takimit të dytë të ekipit negociator për Marrëveshjen e Stabilizim – Asociimit, ku kërkoi nga kabineti i tij qeveritar dhe të gjithë akterët e tjerë të përfshirë në këtë proces, që të mos harrojnë se me BE-në do të diskutohen interesat e drejtpërdrejta të

shtetit.

Ai kërkoi që në aspektin kohor përgjegjësit e sektorëve të ndryshëm të jenë efektivë, sepse vetë procesi është i kufizuar.

Kryenegociatorja në procesin e negocimit të MSA-së, ministrja për Integrime Evropiane, Vlora Çitaku, dha pothuajse të njëjtën porosi, si dhe shpjegoi përse kërkohet seriozitet në raport me Bashkimin Evropian.

“Më lejoni të nënvizoj një gjë shumë të qartë: Duhet të kuptojmë drejt që afatet kohore që do të vendosen në kuadër të MSA-së, do të kenë karakterin e afateve obligative, si pjesë e marrëveshjes kontraktuale me karakter ndërkombëtar. Mospërmbushja e tyre do të jetë mospërmbushje e obligimeve shtetërore ndaj BE-së dhe si e tillë do të paraqesë pengesë të drejtpërdrejtë, në kuadër të procesit negociues dhe integrues të Kosovës”, tha Çitaku

Ministrja Çitaku ftoi të gjitha institucionet që nga fillimi i procesit të kenë parasysh kapacitetet administrative dhe financiare, kur është fjala për zbatimin e obligimeve që derivojnë nga MSA-ja.

/Sonila Duka/