Kryetari i Kuvendit të Kosovës Jakup Krasniqi, ka thënë dje se nuk e sheh veten më në Partinë Demokratike të Kosovës,dhe se në muajt në vazhdim mund të formojë një parti të re.

Krasniqi theksoi se ka nisur bisedimet me shumë njerëz qoftë me të pakënaqurit brenda PDK-së por edhe të partive të tjera, për idenë e krijimit të një subjekti të ri politik. Sipas Krasniqit  Kosova ka nevojë për një qeverisje ndryshe nga ajo që është qeverisur deri tani, dhe kjo sipas tij, mund të bëhet vetëm  me zgjedhje të lira.

Ai ka kritikuar punën e qeverisë duke thënë se problemet  nuk i sheh në interesin e tij apo të partisë por në interesin e qytetarëve. “Problemet nuk kam dashur t’i shikoj me interesin tim e as te subjektit, partia kur merr shumicën ka obligim për të gjithë qytetarët. E sidomos në ruajtjen e pasurisë kombëtare të vendit sikur të ishte e vetja. Ka përgjegjësi  për menaxhim të mirë të parasë publike dhe të jetë në shërbim të qytetarëve të saj. Ajo duhet të ketë politika të qarta fiskale. Unë mendoj se paraja publike dhe pasuria publike nuk po shfrytëzohet si duhet, shumë çka është grumbulluar në duar të njerëzve të paditur”, ka thënë  Krasniqi.

Ai madje e ka mohuar faktin e përfolur në media se mund ti bashkohet ndonjë partie tjetër politike në vend. Krasniqi këto komente i bëri në emisionin Rubikon të KTV, duke thënë se shumë shpejt do ta bëjë publik vendimin e tij, pasi është  i detyruar që të sqarojë opinionin. I pyetur se a do të jetë krahë tij edhe Fatmir Limaj, Krasniqi tha se do të bisedojë me të lidhur me këtë çështje.

/ Elta  Liksenaj /