Zyra për shtyp e bashkisë ka bërë të ditur se qarkullimi në bulevardin “Zogu i Parë ” do të bllokohet nga ora 18:00 e ditës së sotme deri neser në orën 05:00.

Mësohet se qarkullimi do të mbyllet në kuadër të punës për zhvendosjen e shtyllave të linjës së tensionit të lartë nga ky bulevard.

“Transporti publik, linja Uzina Dinamo -Sharrë dhe e Tufinës do të zhvendoset në rrugën e “Barrikadave”- njofton Bashkia.

Kjo linjë tensioni u zhvendos pas 15 vitesh nga bulevardi “Zogu i Parë”. Zhvendosja e kësaj linje, e cila ishte një shqetësim i madh për qytetarët e kësaj zone, ishte një premtim i kryebashkiakut Basha, bërë gjatë fushatës elektorale në vitin 2011.

Për arsyje të kompleksitetit të punës, për futjen nën tokë të kësaj linje, Bashkia e Tiranës mori një ekip të specializuar zvicerian, si dhe bashkëpunoi me OST-në.

Linja e re ka një gjatësi prej 2.3 km,

është ndërtuar me parametra bashkëkohorë dhe i përgjigjet zhvillimit perspektiv të rrjetit të rajonit.

/Sonila Qazimi/