Dritëro Agolli beson tek të rinjtë dhe tek ndryshimi. Në një intervistë për gazetën ‘‘Panorama’’ ai shprehet se ka besim tek kryeministri i ri Edi Rama dhe tek qeveria e tij.

Sipas Agollit, prania e ministrave të rinj në këtë qeveri do të sjellë pozitivitet dhe entuziazëm.

“Më mirë do jetë me figura të reja, sepse do ta fillojnë nga e para dhe nuk do të jenë rutinë, siç ka bërë paraardhësi të bëj dhe unë. Më mirë që janë të rinj, ta fillojnë nga e para dhe të jenë me entuziazëm. Pas luftës, ministrat e qeverisë së parë ishin ministrat më me kulturë që ka pasur ndonjëherë Shqipëria”, ka thënë ai.

Agolli ka thënë se beson tek aftësitë e Edi Ramës si kryeministër, duke e cilësuar atë më të aftë si administrator, sesa si kryetar partie. Në lidhje me ndarjen e ministrave nga mandati i deputetit ai shprehet optimist dhe u sugjeron liderëve që të mbledhin pranë vetes si këshilltarë njerëz të ditur që të këshillohen prej tyre.

Ndërsa për sloganin ai thotë se ‘‘Rimëkëmbje’’ do të ishte termi më i mirë i sloganit të fushatës së PS-së në zgjedhje, pasi ‘‘Rilindje’’ është një term që tregon përmbysje të një sistemi dhe ngritje të një sistemi të ri.

Më tej ai deklaroi se edhe zgjedhja e Bashës në krye të PD-së do të sjellle ndryshime në këtë parti.

/Romina Qama/