Ndeshja kundër Francës ishte speciale për trajnerin Gianni De Biasin, pasi ishte e para e udhëhequr me pasaportë shqiptare. Italiano-shqiptarit i duhet edhe një ndeshje për të kapur rekordin e gjermanit Hans Peter Brigel në drejtimin e Shqipërisë.

Ishte ndeshja e tij e 30-të në bankinën e Shqipërisë, qysh nga miqësorja e humbur 2:1 me Gjeorgjinë në Tbilisi, më 29 shkurt 2012. Rekordin përsa i përket ndeshjeve e mban gjermani Hans-Peter Briegel me 31 të tilla.

Fitorja ndaj Francës ishte e 12-ta, duke kaluar numrin e humbjeve, 11 (përfshirë atë 3:0 në tavolinë me Serbinë), por edhe me 7 barazime në bilanc, për me tepër që ka fituar ndaj Portugalisë së Kristiano Ronaldos, si sot ndaj Francës së Pol Pogbasë.

Edhe pse në një miqësore, ajo është fitorja e parë ndaj një skuadre që ka fituar Kampionatin Botëror (1998), madje nuk ka humbur asnjë në dy ndeshje ndaj “gjelave”, shto këtu dhe barazimin 1:1 në Rennes.

Ishte e para që ai e drejtonte Shqipërinë si nënshtetas i saj. De Biasi nga data 9 qershor 2015 është pajisur me pasaportë shqiptare, e dyta e tij pas asaj italiane, vendit të origjinës së tij.