Nga Suzana Gjeleshi

Shkolla 9-vjeçare dhe gjimnazi i përgjithshëm në Kamëz vijojnë të zhvillojnë  mësimin me dy turne. Ky nuk është një fenomen i panjohur në Tiranë dhe në zonat e saj, sepse shumica e shkollave vijojnë ta ndjekin  mësimin me dy turne dhe me klasat e tejmbushura.

Edhe pse dita është zgjatur, fëmijët vazhdojnë të kthehen në shtëpi vonë për shkak se e zhvillojnë mësimin me dy turne dhe shtëpitë e disave pothuajse një orë e gjysmë larg  nga shkolla.

Prindërit shprehen të shqetësuar për orët e ngjeshura, për numrin e madh të nxënësve që ka një klasë, por shqetësimi më i madh mbetet orari kur përfundon mësimi. Ata janë të detyruar te shkojnë t’i marrin fëmijët e tyre nga shkolla, nga frika e errësirës dhe nga faktorët e tjerë që mund t’i rrezikojnë ata.

Znj. Zenepe Porja tregon se i duhet të lërë gjithmonë punën më herët për të marrë djalin e saj çdo ditë nga shkolla. Gjithashtu i duhet të bëjë një punë të dyfishtë më fëmijën e lodhur për ta ndihmuar në mësime.

Gjithë fëmijët shprehen të pakënaqur, si për orarin e nisjes herët të mësimit, ashtu dhe për mbarimin vonë. Dëbora, Eva dhe Livia shkojnë bashkë në shtëpi, por edhe pse në shoqërinë e njëra-tjetrës ato sërish kanë frikë.

Mësuesi Urim Halilaj thotë se i është dashur të presë dhe të qëndrojë me fëmijët, duke lënë mbas dore edhe punët e tij, derisa prindërit të vinin në shkollë për t’i marrë.

Të gjithë  mësuesit e shfaqin si problem mësimin me dy turne, por shkollat e Kamzës jo para shumë kohësh mësimin e kanë zhvilluar edhe me tre turne. Kalimi me dy turne gjithsesi është një hap i madh për to.

Gjithashtu edhe numri i nxënësve nëpër klasa ëstë ulur krahasuar me disa vite më parë, por gjithsesi mbetet sërish një problem serioz për standardet që duhet të kenë shkollat tona.