Kryeqyteti shqiptar pritet të ketë në funksionim edhe stadiumin “Selam Stërmasi”, para se të mbyllet ky sezon futbollistik. Prej disa javësh po vazhdon puna për “shtëpinë” e re të skuadrës së Tiranës.

Sipas informacionit të dhënë nga ana e zyrës për shtyp e klubit kryeqytetas, rikonstruksioni i stadiumit po ecën me ritme të shpejta, në mënyrë që ish-Stadiumi “Dinamo” të jetë gati para fundit të sezonit. Një dhuratë kjo edhe për tifozët bardheblu, të cilët shumë shpejt do të kenë mundësinë që të shohin ekipin e tyre të zemrës në atë që do të jetë vetëm “shtëpia” e tyre.

Tribuna përkarshi, tribuna kryesore, anekset përballë dhe ato qendrore, një sektor për tifozët miq, ambientet e brendshme si dhe të tjera zhvillime surprizë janë pjesë e këtij projekti me një investim të madh që po realizohet vetëm nga klubi i Tiranës.

Këtë javë ka nisur puna për shtrimin e nënshtresës që do të lejojë më pas vendosjen e tapetit të gjelbër. Në ambientet e brendshme të stadiumit është mbyllur faza e parë e punimeve.