Zëvendëskryeministri dhe ministri i Jashtëm i Kosovës, Hashim Thaçi, zhvillon sot në Tiranë vizitën e parë bilaterale në këtë mandat të ri qeverisës. “Në udhëtim prej Parisit drejt Tiranës duke përgatitur fjalimin e ceremonisë së nesërme në Universitetin e Tiranës”, shkruan z. Thaçi në një postim në “facebook”.

“Ndihem shumë mirë që vizitën time të parë bilaterale në këtë mandat të ri qeverisës do ta bëj në Republikën e Shqipërisë. Mes çështjeve të ndryshme të rëndësishme që do të diskutoj gjatë takimeve sot, një vëmendje e veçantë do t’i kushtohet përgatitjes së mbledhjes së dytë mes dy qeverive tona”, thekson kryediplomatit kosovar.

Në Prishtinë janë paralajmëruar edhe vizita tjera e takime ministrash të qeverive të Kosovës dhe Shqipërisë, ndërkohë që është njoftuar se qeveritë e dy shteteve do takohen sërish në muajin mars 2015, në një mbledhje tjetër të dytë, pas të parës historike të para një viti në Prizren, në 11 janar 2014.