Lushnjë-Një turist austriak rezulton i zhdukur prej 5 ditësh, ndërkohë që denoncimi për të është bërë të mërkurën në mbrëmje. Denoncimin i 62 vjeçarit është bërë nga një grua nga Lushnja mbrëmjen e 20 gushtit.

43-vjeçarja është paraqitur pranë Komisariatit të Policisë në Lushnje duke pohuar se shtetasi austriak ka qenë i akomoduar në Lushnjë nën kujdesin e një shoqatë që pret çdo vit turistë nga e gjithë bota. Gruaja është shprehur në polici se ai ka mbyllur telefoninn duke humbur kontaktet me të.

“Jam administratore e një shoqate në Lushnjë. Çdo vit vijnë turistë në Lushnjë dhe ne i akomodojmë duke shërbyer edhe si operatorë turistikë për ta. Shtetasi 62-vjeçar E.A, nga Austria më datë 16 gusht është nisur për në Fier e më pas donte të vazhdonte për në Gjirokastër. Ai ka udhëtuar i vetëm, pasi ka qenë edhe më parë në Shqipëri. Nga kjo ditë nuk kemi asnjë lloj kontakti me të.” është shprehur 43-vjeçarja.

Menjëherë pas denoncimit Policia e Lushnjes ka nisur kërkimet duke bashkëpunuar edhe me  Komisariatet e qyteteve për ku është nisur turisti, por edhe të rrethe të tjera. Vetë policia e ka të vështirë ta identifikojë, pasi nuk disponon foto të të zhdukurit, por blutë sqarojne se ai ka me vete mjete identifikimi që do të lehtësojnë këtë operacion.