Maturantët do të kenë 7 ditë kohë për plotësimin e formularit A2. Sipas zëvendësministres së Arsimit, Nora Malaj, publikimi i A2 do të bëhet pas datës 24 korrik  dhe plotësimi do të bëhet  online.

Para daljes së tij, kandidatët duhet të bëjnë shlyerjen e tarifës prej  2 mijë lekësh, si dhe hedhjen  në sistem të notës mesatare dhe notave të provimeve. Nga  dita e djeshme deri në datën 22 korrik, nga personeli drejtues i shkollave do  të zhvillohet procesi i hedhjes  së pikëve  të maturantëve në sistem.

Para se të bëjnë plotësimin e formularit A 2 maturantët duhet të kenë paguar tarifën prej 2 mijë lekësh, pranë zyrave të Postës Shqiptare ose në bankat e nivelit të dytë. Më pas duhet të paraqiten në drejtorinë e shkollës  ku kanë bërë plotësimin e formularit A1/A1Z  dhe të dorëzojnë mandatpagesën. Maturantët të cilët nuk e ndjekin procedurën e mësipërme  nuk do të kenë mundësi të aplikojë për formularin A2.

/Arjola Hajdini/