Gjykata e qytetit të Lamias

në Greqi dha për shtetasin grek 18 muaj dënim me burg, i cili mbrëmjen e së enjtes dhunoi 20-vjeçarin shqiptar Bajram Jashari.

Sipas dëshmive të të riut shqiptar në gjyq, të enjten në mbrëmje, teksa po kalonte në rrugë me 2 shokë të tij, neonazisti e kishte pyetur, nëse ishte shqiptar.

Sapo 20-vjeçari iu përgjigj “po”, ai e kishte goditur me kokë në hundë duke i shkaktuar hemorragji.

I akuzuari tha se shqiptari e kishte fyer duke e quajtur “fashist” dhe prandaj ai ishte kundërpërgjigjur duke e rrahur, por kjo u përgënjeshtrua nga djali dhe shokët e tij shqiptarë.

Avokati i viktimës tha se bëhet fjalë për një sulm të pastër racist, ndërsa vetë shqiptari (në foto) u shpreh:

“Unë jam këtu jo vetëm për vete por për gjithë shoqërinë, sepse sot më ndodhi mua, nesër mund t’i ndodhë dikujt tjetër.”

Edhe pse i akuzuari e mohoi në gjyq të jetë militant i partisë “Agimi i Artë”, këtë e

vërtetoi një video e publikuar nga mediat greke, ku ai duket në krah të neonazistëve, në pritje për t’u përplasur me antifashistët, të cilët manifestonin në rrugë për vrasjen e këngëtarit grek.

/Ardiol Hoxha/