Ambasadori amerikan në Tiranë, Aleksandër Arvizu, i bëri thirrje kryeprokurorit Adriatik Llalla

për të shembur murin e pandëshkueshmërisë në Shqipëri. Arvizu ka inkurajuar dje kryeprokurorin Adriatik Lalla për t’u ngritur në lartësinë e detyrës sa i takon betejës kundër korrupsionit.

Gjatë fjalës së tij në takimin me 7 njësitë speciale të hetimit, ambasadori amerikan tha se tranzicioni politik duhet të shikohet si një mundësi për të hapur dosjet e korrupsionit. Për herë të parë pas 22 vitesh tranzicion dhe rivendosje të marrëdhënieve me SHBA, ambasadori amerikan paralajmëroi edhe një fushatë kundër korrupsionit.

“Ju nxis të gjithëve ta shfrytëzoni këtë mundësi sot dhe ta përdorni një pjesë të kohës suaj këtu për të trajtuar ato çështje ndërmjet agjencive që në të shkuarën mund të kenë sjellë bllokim ose pengesa për suksesin e hetimeve dhe ndjekjen penale të korrupsionit”, tha Arvizu.

Ambasadori amerikan deklaroi se mbështet përpjekjet e Prokurorit të Përgjithshëm në luftën kundër korrupsionit. “Ne mirëpresim dhe mbështesim përpjekjet e Prokurorit të Përgjithshëm për t’u siguruar që Njësitë të kenë burime, personel dhe trajnimin që u nevojitet për ta çuar në nivelin tjetër luftën e Shqipërisë kundër korrupsionit publik”, tha ai.

Ndërkohë kryeprokurori Adriatik Lalla prezantoi dje Kosta Belurin si drejtuesin e komanduar të Prokurorisë së Vlorës. Kosta Beluri, prokuror në Prokurorinë e Përgjithshme, nga sot do të ulet në postin e Dorian Tafilit.

GJithashtu kryeprokurori Llalla shprehu shqetësim për ndërtimet pa leje në qytetin e Vlorës, duke theksuar se do të hetohen të gjithë ata që kryen ndërtime pa leje në qytetin bregdetar. “Të gjithë ato që kanë ndërtuar pa leje do të hetohen. Do të ndiqen penalisht edhe të gjithë inspektorët që kanë lejuar ndërtimet pa leje”, tha Llalla.

/Sonila Duka/