Përfaqësuesit e organizatave joqeveritare në Shkup, kanë protestuar sot para parlamentit  kundër ligjit për abortin. Ky ligj pritet të miratohet me procedurë të shkurtuar  nga partitë e maxhorancës, VMRO-DPMNE dhe BDI ndërkaq që sipas protestuesve, ligji nxit kryerjen e aborteve joligjore.

Mbi 90 shoqata vendore dhe disa të huaja kanë firmosur një peticion që ja kanë adresuar deputetëve dhe kryeministrit Gruevski për të mos miratuar ligjin e propozuar.
Sipas shoqatave, gruaja duhet të vendosë vetë për vazhdimin apo ndërprerjen e shtatzanisë pasi ky ligj prek të drejtën themelore të gruas.

Ministri i shëndetësisë Nikolla Todorov  ka thënë se ligji nuk ndikon në të drejtat e gruas por vetëm krijon premisat për një abort të sigurt.

“Nuk është ideja që të ndalohet ndërprerja e shtatzënisë në kushte private dhe kjo nuk qëndron në Ligjin, por mund të bëhet vetëm në institucione spitalore, pa dallim nëse ato janë publike ose private. Mirëpo, duhet pasur kushte komplete që ajo të zbatohet”, tha  Todorov.
Deputetja e BDI-së, Ermira Mehmeti  ka reaguar në faqen e saj zyrtare në Facebook  ku është  shprehur se  shqiptarët nuk kanë pasur dhe nuk kanë nevoje për programe shtetërore për shtimin e popullsisë, prandaj nuk kanë nevojë as për projekte ligjore për kufizimin e numrit të lindjeve.

/ Elta Liksenaj /