Partia Socialiste publikon emrat e kandidatëve për deputetë në 11 qarqe të vendit, mbetet e panjohur lista e emrave në Tiranë.

E përditshmja “Panorama” shkruan sot se qarku në të cilin do të kandidojë kryesocialisti Edi Rama vazhdon të jetë ende i pazyrtarizuar. Mundësitë më të mëdha janë të një kandidimi në Vlorë, por nuk përjashtohet këtu edhe Tirana. Nuk mohohet as mundësia e moskandidimit të z. Rama në këto zgjedhje, shkak janë bërë deklaratat e tij të tipit: “Unë në Parlament do të jem si kryeministër”.

Lista në qarkun e Vlorës vijon me deputetët aktualë: Leskaj, Malaj, Toçi, Deda dhe Xhuvani.
Pritet që listës së PS-së në këtë qark t’i shtohet edhe ish-prokurori i Përgjithshëm, Theodhori Sollaku, ndërsa Arben Isaraj me shumë mundësi do të mbetet jashtë liste në këto zgjedhje.

Qarku i Gjirokastrës është i konfirmuar. Kryeson listën Arben Ahmetaj, ish-ministri i Financave, Anastas Angjeli, sekretari për Rininë dhe Emigracionin, Erion Veliaj dhe biznesmeni Vladimir Kosta.

Emrat e plotë dihen edhe në qarkun e Shkodrës. Kryeson listën deputeti aktual Tom Doshi, vijon me pedagogen Mimoza Hafizi, Paulin Sterkaj dhe Namik Kopliku.

Në qarkun e Elbasanit, përveç emrit të Musa Ulqinit, nuk ka surpriza. Lista kryesohet nga Ben Blushi, më pas vijnë Evis Kushi, Damian Gjiknuri, Taulant Balla, Alfred Peza dhe Musa Ulqini. Mbeten jashtë listës Shegushe Ligori, Agim Leka dhe Skënder Hasa, në diskutim për listen e sigurte mbetet Ilir Bejtja.

Të zyrtarizuar janë edhe kandidatët në qarkun e Beratit. I pari në listë është Eduart Shalsi, vijon me Fidel Yllin, Ermonela Felaj, mjeku Eduart Bejko dhe Stavri Ceca. Jashtë kandidimit mbetet deputeti Marko Bello, ndërsa Erjon Braçe pritet të jetë pjesë e listës së kandidatëve në Tiranë, ose të refuzojë përfundimisht kandidimin.

Në Korçë lista kryesohet nga Pandeli Majko, i ndjekur nga Olta Xhaçka. Bie në sy kandidimi i deputetit të qarkut të Fierit, Bashkim Fino. Lista vijon me Ilir Pandavinji dhe Ilir Xhangolli.

I paqartë mbetet qarku i Fierit dhe i Durrësit. Lista në Fier kryesohet nga Gramoz Ruçi. Në listë është edhe Eglantina Gjermeni, e cila në 2009 u zgjodh në qarkun e Tiranës. Jashtë liste mbeten Albert Caci, Arben Çuko dhe Anduel Xhindi.

E njëjta situatë vazhdon edhe në Durrës, ku Blendi Klosi kryeson listën e PS-së. Kryetari Rama po e konsulton gjatë këtë listë, për shkak të mundësisë së kandidimit të kryeministrit Sali Berisha në këtë qark.