Fondi Monetar Ndërkombëtar zhvilloi një takim me përfaqësuesit e Shoqatës së Ndërtuesve për t’u informuar rreth detajeve të borxhit që qeveria ka ndaj kompanive

private.

Maksim Muçi kreu i kësaj shoqata, ka sqaruar për mediat atë çka u diskutua në takimin me përfaqësuesit e FMN, rreth borxhit.

“Ishte me kërkesë

të ekspertëve të FMN, një takim informativ për të sqaruar më tepër problemet e borxhit që ka shteti ndaj firmave private. Përfaqësuesit e FMN donin të dinin periudhën prej ku është formuar borxhi dhe si ka qenë mekanizmi si ka funksionuar si ka ecur dhe cilat janë problematikat. Kjo është pjesa që edhe ne na intereson më tepër në kuptimin që nuk është vetëm borxhi i kaluar por të jemi të parapërgatitur si të thuash edhe për të ardhmen”, tha Muçi.

Koha dhe forma e krijimit të këtij borxhi ka qenë pjesë e diskutimeve mes misionit të FMN dhe ndërtuesve shqiptarë.

“Sqaruam që borxhi ka filluar që nga viti 2009, nga objektet që ishin për t’u përfunduar në fund të 2009 por që ishte që fushata duhet të mbaronte në qershor vazhduan me objektet që u tenderuan në 2009 për 2010 ne pritëm një reagim, ngritëm problemin dhe pastaj kemi qenë të detyruar që për çdo vit përpara buxhetit të viti pasardhës që të shikonim me kujdes nëse kishte gjë për kryerjen e këtij borxhi apo jo dhe gjithmonë e kemi bërë problem”, vijoi Muçi.

Gjithashtu i pyetur nëse beson premtimin e Kryeministrit Rama për kthimin e detyrimeve që shteti ka prej vitesh pa shlyer, ai është shprehur shumë optimist që kjo të ndodhë

“Gjersa e ka thënë Kryeministri e ka premtuar gjersa FMN-ja tregohet e gatshme të marri vesh sesa është, atëhere ne gjykojmë që do të jepet një financim një kredi që mund ta quajmë për të bërë këtë shlyerje”, përfundoi fjalën e tij, kryetari i Shoqatës së Ndërtuesve, Maksim Muçi.

/Sonila Qazimi/