Përfaqësuesit e shoqatave të Diasporës me origjinë nga Mali i Zi kanë reaguar ashpër ndaj ftesës të bërë nga Këshilli Kombëtar Shqiptaro-Amerikan për të marrë pjesë në darkën e 17-të gala në Nju Jork.

Pas një prononcimi për media, kryetarët e shoqatave të Diasporës, duke analizuar

gjendjen e tanishme të shqiptarëve në Mal të Zi, shprehin shqetësimin për diskriminimin dhe nëpërkëmbjen e të drejtave njerëzore të kryera ndaj popullatës autoktone shqiptare.

“Në mbledhje analizuam veprimet perfide të shtetit malazias për qëndrimet dhe veprimet në shkeljen e të drejtave nacionale e demokratike të Shqiptarëve si: çpopullimi i trojeve tona nga shqiptarët, mos lejimi i përdorimit të lirshëm i simboleve kombëtare, ndryshimi i ligjit për përfaqësimin e popullatës Shqiptare në Kuvendin e Malit të Zi, arrestimet dhe burgosjet gjatë aksionit famëkeq e terrorizues “Fluturimi i Shqiponjës”, injorimi dhe mos dhënja e të drejtës për komunën e Tuzit, tentimi për ndryshimin e strukturës demografike duke sjellur ardhacakë nga veriu i Malit të Zi në Tuz, arrestimet e 23 shqiptarëve në fshatin Martinaj të Plavë-Gucisë, eksproprimi i pronës private në emër të krijimit të parqeve nacionale në pronat private të shqiptarëve të Plavë-Gucisë; marrja e kompetencave në mënyrë arbitrare për pasuritë detare të komunës së Ulqinit si dhe konfiskimi i pronave private të shqiptarëve në Gjirin e Valdanosit”, thuhet në komunikatë.

Lidhur me lidhur me ftesën e bërë, Millo Gjukanoviqit nga Këshilli Kombëtar Shqiptaro-Amerikan (NACC), ai e ka anashkaluar dhe nënvleftësuar rolin dhe aktivitetin e fuqishëm të shoqatave dhe të diasporës tonë në SHBA.

“Ne, përfaqësuesit e shoqatave aktive që veprojmë në SHBA, kryesitë tona dhe anëtarësia e gjerë, e konsiderojmë se një ndërmarrje e tillë e NAAC-ut është më shumë si një spektakël medial sa për të ngopur apetitet e dikujt tjetër në dëm të interesave të Diasporës dhe futjen e grindjeve në mesin tonë. Ne vlerësojmë se

kjo ftesë e bërë Gjukanoviqit është aprovim i shkeljeve sistematike të të drejtave të shqiptarëve dhe bie në shpërputhje të plotë me interesat jetike nacionale të shqiptarëve autoktonë nën Malin e Zi. Kryeministri malazias, Millo Gjukanoviq, duhet të përdorë ndikimin e tij për të garantuar të drejtat e shqiptarëve nën Malin e Zi në përputhje të plotë me konventat ndërkombëtare për të drejtat e pakicave kombëtare etnike”, thuhet në deklaratë.

Ata kanë kërkuar nga qeveria në Tiranë dhe në Prishtinë që të përdorin ndikimin e tyre ndaj këtyre veprimeve të patolerueshme.

/Sonila Qazimi/