Baronesha Catherine Ashton dhe Komisioneri për Zgjerim në Bashkimin Evropian, Stefan Fyle nëpërmjet një deklarate të përbashkët jo vetëm që vlerësuan ecurinë e procesit zgjedhor por gjithashtu theksuan që të krijohet menjëherë qeveria sapo të certifikohen rezultatet e zgjedhjeve.

Kjo gjë sipas tyre është në shërbim të zgjidhjes së menjëhershme të problemeve dhe daljes nga gjendja aktuale e Shqipërisë.

“Tani është e rëndësishme që stadet e mbetura të procesit zgjedhor të kryhen në përputhje me standardet e BE-së dhe ato ndërkombëtare. Ne u bëjmë thirrje të gjitha partive politike të veprojnë me frymë konstruktive për të mirën e popullit shqiptar. Ne ju inkurajojmë që sapo të certifikohen rezultatet të krijohet menjëherë qeveria për trajtimin e sfidave të menjëhershme që ju presin për të garantuar që programi i reformave të vendit do të ndiqet fuqimisht dhe që procesi i integrimit evropian të mund të fitojë një vrull të ri”, theksojnë dy zyrtarët e lartë të BE-së.

Gjithashtu Ashton  dhe Fyle përgëzuan qytetarët shqiptarë për realizimin e zgjedhjeve parlamentare të 23 qershorit.  Sipas tyre procesi u karakterizua nga standartet e pritura.

“Tani duhet garantuar ndjekja e duhur e gjetjeve paraprake dhe konkluzioneve të Misionit Ndërkombëtar për Vëzhgimin e Zgjedhjeve”, thanë zyrtarët e BE-së.

/Erzen Carja/